Akal-akalan Kang Yana Gagal

 

AKAL-AKALAN KANG YANA GAGAL

Gara-gara hayang nganjang ka garwa anyarna, ka garwa lawas Kang Yana balaka nandangan bahla, majar aya jalma barangasan maksad nandasa. Garwana jangar, sabab Kang Yana sapat raratan, ngan aya kandaraanana na jalan Cadas Maha Kawasa. 

Garwana gancang wakca ka aparat kaamanan, alatan nampa warta majar Kang Yana bakal nandangan panandasa sarta paragat nyawana. 

Satampana warta garwa lawas Kang Yana, gagancangan aparat kaamanan tatan-tatan sarta sayaga. Tangtara sarta Basarnas daratang ka Cadas Maha Kawasa. Ngan hanjakal, Kang Yana taya raratanana. 

"Sawangan Abah mah aya naga raksasa, badagna satangkal kalapa, ngahakan Jang Yana. Sadayana wayahna pasrah sarta sadrah kana kadar, apan kaayaan Jang Yana aya na padaharan naga!" Abah Jaga Cadas Maha Kawasa wakca. 

Sabada Salasa, aya warta majar Kang Yana aya, pananganana kasampak nyampay na taktak garwa anyarna. Malah tatanggana wakca, majar Kang Yana lalangkarakan na amparan samak, sarta pananganana nyasar kana kawasan handap garwa anyarna. 

Apal Kang Yana aya, baraya sarta tatanggana nganaha-naha. Gara-gara hayang nganjang ka garwa anyarna kalawan manjang, wakca ka garwa lawasna majar aya jalma gangas maksad nandasa, nyatana gagal, kalah sanagara arapal. Ah, dasar Kang Yana, akal-akalanana gagal.

Ku : Taufik Faturahman

KiBa.