Warta: Kebon Raya Kareueus Urang Kuningan

 

Kebon Raya Kareueus Urang Kuningan

 

Kuningan, Sora Jabar (21/03/2017)

Urang Kuningan jeung sabudeureunana mun hayang ulin ka kebon raya, teu kudu jauh-jauh ka Bogor. Ayeuna mah di Kuningan ogé aya Kebon Raya Kuningan . “ Insya Alloh bakal jadi kareueus urang Kuningan”, ceuk Bupati Kuningan, Acep Purnama, basa dikolongan  ku wartawan Sora Jabar, Salasa (21/03/2017).

Acép nétélakeun, yén diwangunna Kebon Raya Kuningan téh luyu jeung visi Pamaréntah Kabupatén Kuningan nyaéta Kuningan Kabupatén Konservasi.”Éta saluyu jeung kaayaan alamna anu éndah, caina cur-cor, sarta hawana anu seger, kawantu ayadi tutugan Gunung Ciremay”, ceuk Acep.

Kebon Raya Kuningan téh perenahna di Desa Padabeunghar, Kacamatan Pasawahan, Kabupatén Kuningan. Ngurug aréa anu legana 154 héktar di tutugan jeung lamping kulon Gunung Ciremay. Di jerona aya leuwih 23 rébu jenis tutuwuhan. Dilengkepan ku fasilitas séjénna saperti situ, jaslan, tempat reureuh, tempat pinton, tempat pabinihan, jeung kantor.

Kebon Raya Kuningan diwangun gawé bareng antara Lembaga Ilmu Pengetahuan Indonesia (LIPI), Kementrian PUPR, jeung Pemkab Kuningan.

Sakumaha anu ditétélakeun ku Kapala LIPI, Iskandar Zulkarnain, Kebon Raya Kuningan miboga fungsi anu lega ambahanana. Nyaéta pikeun kapentingan atikan, panalungtikan, rékréasi, ékonomi, jeung konservasi. “Jadi lain ngan saukur keur piknik”, pokna.

Kebon Raya Kuningan  anu diresmikeun taun 2015 téh mémang kiwari geus jadi salasahiji tujuan wisata favorit di Kuningan. Sanajan masih kénéh dibebenah sarta aya sawatara fasilitas anu keur dipigawé. Kungsi ditutup keur umum, tapi kulantaran lobana pameredih ti masarakat, bulan Januari 2017 Kebon Raya Kuningan dibuka deui keur umum.

Pancén 1

Pikeun maham eusi bacaan di luhur, pék jawab pananya di handap!

1. Naon anu bakal jadi kareueus urang Kuningan téh?

2. Diwangunna Kebon Raya Kuningan téh saluyu jeung visi Kabupatén Kuningan. Tétélakeun, naon maksudna?

3. Di mana perenahna Kebon Raya Kuningan téh?

4. Naon baé anu aya di Kebon Raya Kuningan téh?

5. Pihak mana baé anu ngawangun Kebon Raya Kuningan téh?

6. Naon baé fungsi Kebon Raya Kuningan téh?

7. Kebon Raya Kuningan kungsi ditutup, tapi dibuka deui pikeun balaréa. Naon sababna?

8. Sakanyaho hidep, di mana baé anu aya kebon raya di Jawa Barat téh?