HAYU URANG NEDUNAN TALATAH KAASIH TI ALLOH

بِسْــــــــــــــمِ اللهِ الرَّحْمَنِ الرَّحِيْـــــم

HAYU URANG NEDUNAN TALATAH KAASIH TI ALLOH

Teu kénging ngaengké anu ku Alloh dipikaresep supados  Alloh ogé henteu ngaengké-engké naon rupi anu dipicangcam ku urang.

Kalintang reueusna ningal wargi sadaya anu nuju teras jihad sapertos milari kipayah kanggo kulawarga sareng mémérés masalah saupami kagungan kénéh masalah. Tah, ayeuna urang kénging Talatah Kaasih ti Alloh kanggo mikanyaah tur mikaasih wargi urang anu nuju kamusibahan di Lombok. Sim kuring ngaraos reueus pisan saupami éta Talatah téh langsung dipidamel ku urang, henteu diengké-engké. Jalaran Insya Alloh Mantenna ogé moal ngaengké-engké naon rupi anu diperedih ku urang.

Wargi sadaya kaasih Alloh, wargi urang di Lombok danget ieu henteu mung ukur peryogieun ku du'a ti urang, nanging ogé kalintang peryogieunana ku rejeki anu parantos diwiatkeun ku Alloh ka urang supados ku urang dipasihkeun ka aranjeunna sapalih. Sapalih waé, teu kedah sadayana.

Di kempelan-kempelan urang tos seueur anu nguningakeun perkawis aya lembaga anu tiasa ngajajapkeun bantosan ti urang, boh mangrupi nomor rekening kanggo transfer, boh mangrupi ekspedisi pos anu haratis sapertos anu tadi didugikeun ku Ari 2010.

Teu langkung badé masihan sabaraha atanapi sakumaha waé. Alloh tetep masihan aprésiasi kana kanyaah urang. Nanging insya Alloh urang hoyong masihan rejeki anu saé. Urang masihan ka wargi urang anu meryogikeun téh hakékatna mah masihan padamelan anu dipikaresep ku Alloh. Ngarah Alloh langkung resepeun hayu urang masihan téh anu langkung saé. Tangtos anu saé ogé luyu sareng anu kadada kaduga ku urang. Upami téa mah anu kadada kaduga ku urang téh angger mung sakedik, mangga téh teuing. Apan sok sanaos sakedik kasaéan urang tetep bakal dicatet tur bakal kénging wawales ti Alloh SWT, sapertos kaunggel dina Q. S Al-Zalzalah ayat 7.

فَمَنْ يَعْمَلْ مِثْقَالَ ذَرَّةٍ خَيْرًا يَرَهٗ

Sing saha jalma anu migawé kahadéan sagedé siki zarrah, pasti manéhna bakal ningali (wawales)na.

Talatah Kaasih ti Alloh parantos dugi ka urang, hayu urang énggal-énggal tedunan. Insya Alloh Mantenna bakal énggal-énggal langkung mikaasih ka urang.

Mugia urang teu weléh aya dina panangtayungan Mantenna. Mugia urang teu weléh dipancegkeun dina iman sareng takwa. Mugia manah urang teu weléh léah tur nyaah ka sasama.

Amiin yaa robbal aalamin.
(SAPAMASS-UNPAD: Ani H)