Pépéling nu kungsi nyanding

Pépéling nu kungsi nyanding

Ku: A. Yogaswara

Anaking jimat awaking,

Niti wanci nu mustari, ninggang mangsa nu utama, kiwari hidep parantos mungkas mangsa lalagasan. Sujud mah mung Ka Nu Agung, nyembah mah ka Alloh SWT, sungkeman jadi ciri nu mandiri, cara nu nyata pikeun matrikeun kaasih, nyimpaykeun kanyaah, maheutkeun kadeudeuh.

Anaking jimat awaking,

Indung tunggul rahayu, bapa catang darajat. Sakeclak ci susu indung, hamo kabales ku lobana dunya barana. 

Anaking jimat awaking,

Prak geura ngajerit dina ati sanubari anu wening, dina manah anu setra. Neda jiad pangdunga jeung pangampura ka nu jadi sepuh. Sawarga téh aya dina dampal sampéan indung.

Anaking jimat awaking,

Rumah tangga téh énteng jeung bangga, énténgna pami urang mituhu ka pituduh sepuh tur Rosul, teu baha ka paréntah agama. Jaga mata ku awasna, jaga haté ku ihlasna, jaga harta ku zakatna, mugia taqwa ngabaju, ngabaku miaraga sukma dina jiwa, Islam pingaraneunana, surga pangbalikanana.

Anaking jimat awaking,

Bral  geura naratas lalakon anyar, sagara kahirupan, bébér layar tarik jangkar kasmaran picaritaeun deungeun, mugia ginanjar kawilujengan tinekanan nu diseja. Aamin ya robbal aalamin